2015 Honeymoon Portugal & Spain – Day 2

來到第二日,尋晚都算訓得幾好,可能都透支左七個小時,不過一起身,就發覺今日的天氣唔係幾好,灰雲密佈,好似好想落雨咁,不過就算咁都唔會影響到我地的行程,哈哈~~

起身梳洗完我地就出發喇~~基本我地都無過早餐食咩,點知行過apm附近見到一間麵包店,仲要好多人幫襯,所以我地都唔好執輸都去買番兩個麵去試下先~

味道都係咁,比香港的大但亦比香港貴~哈哈~~

好味的牛角包~

我地的第一個行程點係Elevador de Santa Justa (聖胡斯塔升降機),呢架咁既野係apm附近,行去都係五至十分鐘距離,點解要來係因為我地一來到買左張當地八達通,張八達通係包埋搭呢部升降機,如果唔係就麻煩乖乖咁奉上五歐。

好似好高咁,至少企到上去可以望到整個Libon的全貌。

yeah,我地就係買左左二個張青bb的八達通,咁就慳番五歐,抵晒~

上到去其實唔係最高點,周圍仲有圍欄包住,而只要俾多1.5歐,就可以直上天台,無阻欄咁睇晒全景。當然一場黎到,呢1.5歐係絕對俾佢地賺的。

唔知係咪心態的唔同,搭lift的西方遊客好多,但再佢地額外俾多1.5歐又無咩人肯,但老老實實,個感覺差好遠喎,天台個view無得輸啦~~

一上來就可以俯望晒整個Lisbon的市中心,天氣唔好打左個折扣。

對面山上係阿法瑪區上的Castle Sant Jorge (聖喬治城堡),本來諗住下午去,但可惜最後都無去到,可算是整個旅程的一個遺憾。但願有生之年可以再去啦~~~~

Castle Sant Jorge (聖喬治城堡),可惜無去到。

再望去另一邊,已經係Tagus River~~~~,可以想像到,其實整個Lisbon都係依山而建~

Tagus River的另一邊係連住北大西洋了~~~

呢條係Rua Augusta,可以話係Lisbon其中一條最出名的大街~

除左型,還是型~

最後再來一個全景~

係天台唔係逗留好耐,我地就走人,因為我地仲要搭火車去另一個小鎮~~~

係遠處就可以睇到只係只俾五歐同額外俾多1.5歐樓層的分別~

我地今日的主要行程,就係去Sintra到參觀。平均每廿分鐘就會有一班火車去Sintra,所以都唔使book(應該都無得book),大把位。

係到講下張八達通先,張野其實係24小時計包搭Lisbon的交通工具,24小時係指由你開始用的第一程開始計24小時,而呢程火車其實都包括係張八達通任搭的範圍。

不過去到Sintra的交通工具就唔包了,所以,怕麻煩的小宗就決定買左張包晒來往Sintra的火車同Sintra內的巴士的1 day pass。

無計錯好似一張要15歐,我計過去到Sintra的費用,係遠遠多過呢15歐,所以基本都係必買的~。

火車已經等緊我地了~~~yoyoyo~~~

經過40分鐘的火車,我地到達Sintra,一個好正的小鎮,最重要係來到呢到,天氣好到不得之了,曬到hihi~~

呢到巴士唔多,基本上巴士都係為遊客而設,睇到個巴士站牌大家就會明白了~。

所以巴士路線都會標埋佢地會經過的景點。

其實原本的行程係無諗過留係Sintra到遊覽,因為我的最終想去的係歐洲的最西點:Cabo da Roca

BUT

人生最機巴的就是這個BUT!

我地一見到Sintra的城牆就被佢迷倒了,所以決定要花點時間上去看看。

幸好,

幸好我地並沒有錯過,因為實在太靚了。

麻煩交低入場費8歐!

入到去就見到勁多銹球花,仲要勁大勁多顏色,老婆即時心花怒放,哈哈。我對花其實無咩太大感覺,我諗我見到玩具時應該同佢而家的樣差唔多,嘿。

求其搵一個都大過我手掌

再行入d就見到城牆了,城牆的歷史麻煩問google,我只知係摩爾人起的。

整個城牆都好靚,配合藍天白雲無得輸呀~~

好彩唔算好多人,唔係真係逼到跌落街呀~

唔,突然發現左個亮點。今日隨後的行程都成日見到呢個女子,最後知道佢係香港人,自己一個來旅行,可惜唔係靚女,所以我無興趣,sor。

由於我地係中間上去,所以我地先去右邊,再轉頭去上山去左邊。唔好講少,堅攰~

風景真係無得輸

 

人型點影都型。

背後紅色個個都係其中一個景點,影左當去左~

去到最右邊,要掉轉頭上山了~~望到都覺得攰呀~

旗幟飄揚~~~

行完堅攰,風景堅靚,天氣堅好。果然沒有來錯。

走時見仲有45分鐘時間,就走去覓食。求其中間近巴士站的餐廳。質素好一般。

燒蝦

雜扒

雖則話有45分鐘,但外國人上餐好漫,避免miss左班巴士,我地要係20分鐘內ko晒先得,食得好急。哈哈~~~

食完仲要跑去巴士站,去到已經見到好多人,都怕怕地上唔到車,等呀等。

竟然過左時間都唔見車,真怪,因為歐洲一向的交通工具都好準時。

到最後等多左廿分鐘,竟然都未有車,最後站長即時叫左兩架車來。

順利上到車仲有位坐,因為車程都要40分鐘。

目的地就係全歐洲的最西點:Cabo da Roca

風光明媚,如斯如畫,一望無祭的大西洋,唯一可惜係好多皮皮,頂。

 

 

同上次係dubrovik到望住地中海一樣~~不過呢個係大西洋,仲勁呀~~~

連淫胡同杯麵都忍唔住振臂高呼~~~

 

來到呢個Landmark一定要影相既。

 

見到有外國人即興玩體操,但亮點係左下個小pk,佢見到人地玩佢又玩一份,結果唔使講係慘不忍睹啦~~~

係到留左一個鐘左右就搭巴士繼續向南行,去左另一個小鎮:Cascais。但可惜我地無時間閒逛呢個小鎮,即時係呢到搭火車返去Lisbon了~~~

到達Lisbon我地就沿河邊向市中廣場到行了~

朝早天灰灰,而家變得藍天白雲,真好~

黎到呢個廣場,嘈到拆天,仲擺左檔,感覺好似開嘉年華會咁。唔通今晚有活動?

 

凱旋門

嘩,沙甸魚呀~~~即時燒,好正

其實我估今晚係一個重大節日,因為周街的人都戴上沙甸魚帽,餐廳基本上只會燒沙甸魚咁,行行下仲見到架巴士,巴士上的美女見到我影佢地,係咁叫我join佢地,頂,我老婆係隔離呀,玩我咩

拜拜,我地都係有緣無份架~喇~~哈哈~~~

又一檔燒沙甸魚

本來我諗住係返來去阿法瑪區上聖佐治城堡,但我見周圍都封晒路,都唔知點搭車上去,諗諗下自己又懶,所以無上去。哈哈哈

既然無上去,自然又周圍行,行行下見到一間老店專買炸馬介休。睇個樣我已經流晒口水了。

 

影得真好~至少吸引到我

 

仲要有個係用金做,咩料呀~~一定要試下佢的真偽

好靚,亦好貴~一個要4歐幾

同老婆一人一個唔好爭~嘿。味道好好味,好大個,充滿魚肉,中間流心的芝士簡直係邪惡的化身。

再向北行就見到封晒路,嘩,唔係咁啱撞正佢地的節日咁好呀?一陣一定要出來睇下先。其實呢個時已經接近晚上九點~~~~

 

警察

當然我地都無再等,因為醫肚要緊。去左當地其中一間餐廳,無他,因為佢好熱情落力介紹餐牌俾我地。

super bock,當地最common的啤酒

我同老婆每人叫左一個主菜,怕叫得太多食唔晒。我叫左煎鱸魚。

唔好講真,個size勁大,有一隻半我手掌咁長。價錢又唔係貴。性價比奇高。

回想起整個旅程,呢一餐飯的整體表現,應該係最好的一餐。現家回想都覺得好好味~~哈哈

老婆叫左個海鮮燴飯,d料多到呢~~真係兩個人食都夠呀~

你睇下,成煲上,唔使講,當然係我負責埋尾啦~~~嘿

呢一餐真係無得輸。侍應仲要主動幫我地合照

食完走人已經見到全街都塞滿晒人,好似香港的花車巡遊咁(雖然我係香港無睇過),怕蝕底的我,當然要企埋一份睇下有咩好睇啦~~

多人到呢~~

最後真係好似花車巡遊咁,好多小朋友著左唔同的服飾出場,見到我影佢地個個都笑容滿面咁望鏡頭,真好。

其實呢個時間已經過左十二點,點解要咁夜先開始,哈哈~~~~

不過我地只係睇左兩隊巡遊就走人了,一來真係好好好多人,二來其實我地都好眼訓,玩左成日,係時候要休息去了~~~~~

明天。

明天就要出發去我期待的波圖喇~~~~

runningdog18

我的生活態度好簡單: 知足常樂,過自己喜愛的生活。

You may also like...

10 Responses

  1. 9527 says:

    部lift好型喎,抵畀啦上天店,唔上會後悱,等於你無join靚女巴士一樣囉。

    個城牆一個字,好正。

    有無買罐頭沙甸魚先,嘿。

  2. 9527 says:

    人型點影都型,我好同意,幾時出閃卡

  3. 大佬 says:

    景靚人靚野食靚, 連杯麵都靚!

Leave a Reply

Your email address will not be published. Required fields are marked *