2017 北九州自駕之旅 – Day 2

來到第二日,計劃趕不上改變,估唔到已經即時改變行程了~哈哈~

原本今朝計劃係朝早拎左車後就先去北九洲的河內滕園睇出晒名的紫滕花,出名在於被外國列入來日本必看的31景之一,加上日本黃金週的展開,河內滕園實多人到pk,因此事前已經上網訂定好門票。

不過天氣不似如期,令到我地河內滕園的紫滕花仲係開得好麻麻。既然唔順路特登去個到睇開得三四成的紫滕花,不過直接cut左呢個行程好過~

點唔順路? 如果要去河內滕園,來回的行程我要自駕多差唔多130公里呀~

好處係令到今日的行程順路好多,亦多了更多時間去其他景點。
壞處係令我地每人蝕左500円,哈哈~

所以第一站我就去左離福岡最近的太宰府。

大約30分鐘車程,好快就泊好車就週困圍閒逛~

搭JR就會直接來到太宰府駅了~

今日的天宰府好多人,除左遊客外,仲有海量的學生,因為太宰府的天滿宮係主要俾學生祈求考試合格的地方,加上又日本黃金週,多人的情況直逼星期六日旺角的西洋菜街呀

太宰府除左天滿宮出名外,仲有一間經過特別設計的Starbucks都係景點之一

 

想要影到無人其實好難,不過既然有日本學生妹大家都唔會介意~

 

膝頭對上目測至少三至四吋,錯晒重點

見一無人即時衝埋去先得~

 

不過我地都無入內嘆下咖啡,只係係門口影下相就走人了~

我地之後繼續行,目的地係前少少的天滿宮。

今日天氣幾好,而且好熱,遊客同本地人都好多~

 

又發現獵物,可惜實在太遠,裝備不足。話時話,黎過幾次日本,好似係得呢一次呢一到先有咁多學生

來到天滿宮,當然都好多人啦。個個都祈求考試合格咁,哈哈~~~

於唔使再考試的我黎講,當然無咩野好求啦~呵呵~

合照~~不過今個TRIP都唔多

同老婆一齊用藍色太陽眼鏡,襯到絕呀~

之後就打回頭路返出去了~ 

途中見到呢隻野,好似係叮噹大長篇時見過~~

另外日本有個可愛的地方,就係當地有咩名物出名的,就會發現到成條街都會一齊買同一樣野

而呢到係興豆沙梅餅,感覺上其實都係日式燒餅~味道一般般啦~

 

不斷整不斷有人排隊買

如果你問我,我就覺得味道好一般了~

繼續行仲見到宮崎駿專門店,當然裡面的野係貴到喊啦~~~打左個白鴿轉就閃人。

識野用左隻大龍貓來招客~嘿~ 

到lunch時間我地就去左食出名的拉麵店,叫暖暮,好似好多地方都有分店~

唔使講一定要排隊啦,好彩未至於好誇張,我估排左半個鐘左右啦

終於都入到坐了,店鋪設計模式都係用自助售票機去買~方便快捷~

連龍哥見到都好驚訝

說實話,呢碗拉麵係好對辦的。無論湯底麵條叉燒半熟蛋都好好味,最後我係連湯都飲埋佢呀~~哈哈~

賣相質數價錢都無得輸

食飽之後,我地就繼續南下。既然今朝無去河內滕園到睇紫滕花,咁我就直接就去左好近柳川的中山到睇

來到中山之大滕睇紫滕花,來呢到勝在夠近我地下一個目的地,加上又係免費,仲要開得夠燦爛~~抵呀~

 

 

 

 

 

好多日本人公公婆婆都走來坐低吹水食野慢活咁欣賞紫滕花,寫意生活。

睇完紫滕花,我地就轉戰今日最後一個景點:水鄉柳川~

泊好車就已經見到水道,當然唔少得有人坐緊小艇遊覽啦~

等我,我地轉頭都會感受下~

唔知係咪我地太遲先來到,發現呢到好似死城咁,店鋪無開,亦無咩人。哈哈~~

呢個畫面都有d似倉敷,不過當然倉敷靚好多~

其實柳川都好大,我泊左係比較偏遠的位置,原因係因為想去一間好出名食蒸鰻魚飯的店。

BUT

人生最意想不到的就是這個BUT

滿心歡喜來到店鋪 ,見到

是。日。定。休。日

係我錯,竟然無CHECK到今日係定休日。

係我懶係心灰意冷的時候,我決定要去搭船散下心~

啟航~當然係船夫撐船~ 

 

孤獨老人MODE啟動 – 落莫的背影

 

 

玩到最後我都一試身手去做下船夫,唔使講當然係好難控制啦~

船夫都無眼好睇~嘿~

玩完船,又到晚餐的時間。經歷過摸門釘之苦後,我當然唔會放棄我要食蒸鰻魚飯的夢啦~

PLAN左行程大大話話都好幾年,當然會有兩手準備~

登凳,就係轉去食第二間出名蒸鰻魚飯的店囉~~~哈哈哈哈哈哈哈哈哈~~

去唔到原本想去的若松屋,就去歷史更悠久的元祖本吉屋~

一係唔去,一去我地就去本店,充滿舊式風味~

由於我地避免等好耐,所以勁早唔夠六點就來了~

餐牌~基本上都係食蒸鰻魚飯~

說實話,整座餐廳都係好好。由於係舊式,連坐法都係行傳統式,無錯,就係坐榻榻米端坐法

唔使講對我呢D死肥仔黎講,呢種坐法等同要了我半條命,令我完全唔舒服咁享受呢餐晚餐,絕對係一個大敗筆。

綠茶~

每人都有的前菜,應該係燒鰻魚,好味

大家都唔客氣了~

由於佢即叫即整,先燒鰻魚再塗上秘製鰻魚汁再燒,最後就放係飯到拎去蒸,等鰻魚汁可以流晒入去飯到。人間美食,正呀~

 

我唔客氣了~~~好滿足

食飽就開車去佐賀酒店休息休息了~~~

明天再戰~~呵~

+++++++++++

死人塵,激死我

runningdog18

我的生活態度好簡單: 知足常樂,過自己喜愛的生活。

You may also like...

Leave a Reply

Your email address will not be published. Required fields are marked *